قدرت کی نوازشات کا چمن ہے کوکن

اہل کوکن سے گزارش ہے کہ آپ کے پاس کوکن کے تعلق سے دلچسپ معلومات ، مضامین ، شعری تخلیقات ، تصاویر وغیرہ جو کچھ بھی ہے اسے ہماری ای میل آئی ڈی پر ارسال کیجیے ، اردو نیوز ایکسپریس ڈاٹ کام اسے آپ کے نام کے ساتھ شائع کرنے کے ساتھ ساتھ اسے اپنے ذخیرے میں محفوظ بھی کر لے گا ، تاکہ آنے والی نسلوں کو جب بھی اس قسم کی معلومات کی ضرورت پیش آئے ، تو وہ فوراً حاصل کر سکیں ۔ آئیے مل کر کوکن کی تاریخ رقم کریں ۔ یہ سلسلہ ہم یکم فروری سے شروع کرنے جا رہے ہیں ۔ای میل آئی ڈی  درج  ذیل ہے

urdunewsexpressonline@gmail.com

کوکن کو قدرت کی نوازشات کا بڑا حصہ تحفے میں ملا ہے ۔ سب سے اہم اور بنیادی تحفہ تو کوکن کی ہریالی ہے ۔ جب بھی جایئے ، جس موسم میں بھی جایئے ،لگتا ہے اس خطے کو خزاں نے کبھی چھوکر نہیں گزری۔ جدھر دیکھیے سر سبز و شاداب وادیاں … سبزہ زار …مرغ زار… گنگناتی ندیاں … ہرے بھرے جنگل اور ان جنگلوں میں اکثر پھلدار درخت … آم ، کاجو، کوکم ، ناریل ، جامن، کروندے ،کٹہل اور … بیریاں … اور یہ سب آپ کی دست رس میں … مفت ۔ اس کے علاوہ بستی بستی گنگناتی ندیوں میں مچھلیوں کے رقص … چھوٹا سا بچہ بھی جال لے کے جائے اور مچھلیاں پکڑ کے لے آئے… ایسا لگتا ہے ، جیسے سورہ ٔ رحمن کی تلاوت ہو رہی ہو … ’’تم اپنے رب کی کون کون سی نعمتوں کو جھٹلاؤگے …؟‘‘
کون کہتا ہے ، من و سلوا کا نزول بند ہو گیا …؟ اہلِ کوکن اس معاملے میں خوش نصیب ہیں ۔ کوئی کچھ نہ بھی کرے ، مگر بھوکانہیں مر سکتا ۔ قدرت کی یہ تمام نعمتیں اسے حاصل ہیں ۔ ایک ذرا ہاتھ بڑھانے کی دیر ہے … لیکن … صرف ایک معمولی سی شرط ہے … آم کا درخت اگر کسی کی ذاتی ملکیت ہے اور اس کی ڈالیاں پھلوں سے لدی ہوئی ہیں ۔ اگر کوئی پکا ہوا پھل ہوا کے جھونکے سے نیچے گر جائے ، تو جس نے پایا ، اس کا ۔ اسی طرح کاجو کے پھل کے لیے یہ شرط ہے کہ پھل کھائے اور بیج درخت کی جڑوں میں رکھ دے۔یہ شرائط صرف ان ہی دو پھلوں کے لیے ہیں ۔باقی جتنے پھل جنگل اور سڑک کے کنارے دستیاب ہیں وہ آپ کے ہمت و حوصلے پر ہے ۔ توڑیں اور کھا لیں ۔
…ارضِ کوکن ہمیشہ سے تصورات کا الف لیلوی علاقہ رہا ہے ،جہاں کا حسن اور حسین مناظر بڑی کشش رکھتے ہیں…عطیہ فیضی کے نام سے اس خطے پر قوسِ قزح کے رنگوں کی چھوٹ پڑتی ہے … یہ علاقہ داؤد غازی جیسے البیلے شاعر کا مولد و مسکن ہے … اس کے علاوہ ’’ امرائی ‘‘ والے شاعر بدیع الزماں خاور ، آدم نصرت ،ساحر شیوی ، عارف بانکوٹی، حیرت کوکنی( حمزہ دلوی) ، اختر راہی ،شرف کمالی ، یعقوب راہی ، نور پرکار ، پرویز باغی اور تاج الدین شاہد جیسے شاعروں کے علاوہ ڈاکٹر عبدالستار دلوی ، ڈاکٹر میمونہ دلوی ، ، ،عبدالحمید بوبیرے ، عبدالسمیع بوبیرے ، سلمان ماہمی، مبارک کاپڑی ،علی ایم شمسی اور رحمٰن عباس جیسے ادیب ،صحافی اور محقق بھی ، جو آج آبروئے ممبئی ہیں ، مگر جن کا خمیر خاکِ کوکن سے اٹھا ہے ۔سماجی و فلاحی شعبوں میںڈاکٹر عبدالکریم نائک ،ڈاکٹر ظہور پاٹنکر ، ڈاکٹر نظیر جیوالے ، ڈاکٹر محمد علی پاٹنکر ، ڈاکٹر عبدالرحیم اندرے ،ڈاکٹر خلیل مقادم ، ڈ اکٹر ایم او شیخ ، ڈاکٹر فقیر محمد کلے ، ڈاکٹر خلیل دلوی کیپٹن فقیر محمد مستری ، ڈاکٹر ذاکر نائک ، حاجی عبدالرزاق کالسیکر اور الحاج عبدالسلام راول کے حوالے سے اس علاقے کو وقار و اعتبار حاصل ہو چکا ہے ۔اسی علاقے سے ابھرتے ہیں ر عبدلرحمن ونو اور حسن چوگلے بھی ۔ عبدالرحمن ونو کے ذریعہ قایم کیےگئے حنان کرکٹ کلب نے ہمیشہ بے مثال کامیابی حاصل کی اور اول مقام پر رہا ۔
سیاسی افق پر مصطفیٰ فقیہ ، رضوان حارث ،بیرسٹر عبدالرحمن انتولے ، سنئیر حسین دلوائی ، سلیم زکریا ، جونیئر حسین دلوائی ، مشتاق انتولے اور حبیب فقیہ جیسے نام نظر آتے ہیں ۔
… ان سب سے بڑھ کر دنیا کے بہترین آم ہاپوس کا علاقہ ہے …مرزا غالب ؔ اگر یہاں آئے ہوتے ، تویقینا کسی امرائی میں ڈیرہ ڈال دیتے اور پھر وہاں سے کبھی واپس نہ جاتے وغیرہ وغیرہ …اور دیوانِ غالب ؔمیں آج دہلی اور لال قلعے کے بجائے کوکن کی قوسِ قزح اور کہکشائیں نظر آتیں ؟
کوکن دراصل چار اضلاع پر مشتمل ہے ۔ تھانے ، رائے گڑھ، سندھ درگ اور رتنا گری۔ خوبصورت کوکن کی وادیوں میں رفتہ رفتہ شہر داخل ہو رہے ہیں  اور یہ شہر ترقی کے ساتھ ساتھ کوکن کی اصل تہذیب کو کھاتے جا رہے ہیں ۔ اہلِ کوکن چاہیں تو اپنی تہذیب و روایات کوزندہ رکھ سکتے ہیں ، کہ تہذیب ہمارا سرمایہ ہے ۔ مگر سوال یہ ہے کہ بدلتی ہوئی تہذیب کے دور میں نئی نسل کس طرح واقف ہو سکتی ہے ، کوکن کی اصل تہذیب سے؟ اگر ہم نئی نسل کو اس سے واقف نہیں کرائیں گے ، تو وہ تہذیب کے اس ورثے سے وہ محروم رہ جائیں گے ۔’’ اردو نیوز ڈیسک ‘‘ ایسا ہی تہذیبی و ثقافتی تحفہ اہل کوکن کو پیش کرنا چاہتا ہے ۔ اب روزانہ آپ کوکن سے وابستہ بہت سی باتوں سے واقف ہوتے رہیں گے ۔ مثلاً کوکن کی تہذیب ، بولی ، پکوان ، لوک گیت ، لوک کتھائیں ، مقامی موسیقی ، جماعتی نظام ، خوبصورت مسجدیں ، کھاڑی کناروں کے گاؤں ، پاپڑ ، اچار ، میٹھے پکوان ، کاشتکاری اور سیاحتی مقامات بہت کچھ ۔ اس کے علاوہ بولی اور زبان کے ٹکراؤ سے پیدا ہونے والے لطیفے ، شاعر ، ادیب ، صحافی او ر سیاسی لیڈروں کا مختصر تعارف ۔ یوں سمجھ لیجیے کوکن کی کہکشاں کے جگمگاتے ستاروں کا تعارف ۔
اہل کوکن سے گزارش ہے کہ آپ کے پاس بھی اس تعلق سے دلچسپ معلومات ، مضامین ، شعری تخلیقات ، تصاویر وغیرہ جو کچھ بھی ہے اسے ہماری ای میل آئی ڈی پر ارسال کیجیے ، اردو نیوز ایکسپریس ڈاٹ کام اسے آپ کے نام کے ساتھ شائع کرنے کے ساتھ ساتھ اسے اپنے ذخیرے میں محفوظ بھی کر لے گا ، تاکہ آنے والی نسلوں کو جب بھی اس قسم کی معلومات کی ضرورت پیش آئے ، تو وہ فوراً حاصل کر سکیں ۔ آئیے مل کر کوکن کی تاریخ رقم کریں ۔ یہ سلسلہ ہم یکم فروری سے شروع کرنے جا رہے ہیں ۔

urdunewsexpressonline@gmail.com

Please follow and like us:
0

Leave a Reply

Your email address will not be published. Required fields are marked *

Facebook Auto Publish Powered By : XYZScripts.com